La ZAMPOGNA monrealese

La tradizionale ZAMPOGNA  monrealese

in 

Biblioteca Comunale

con i preziosissimi artisti 

*Salvatore Modica *Emanuele Modica  *Benedetto Miceli

VEDI ANCHE SU:

https://it-it.facebook.com/monrealenews.it/

Santo NATALE : Viaggiu dulurusu...

 Libri in biblioteca....

Francesco Conigliaro – Anselmo Lipari -  Cosimo Scordato

NARRAZIONE TEOLOGIA

SPIRITUALITA’ DEL NATALE

“VIAGGIU DULURUSU DI MARIA SANTISSIMA

E

LU PATRIARCA S. GIUSEPPI IN BETLEMMI”

Canzunetti siciliani di Binidittu Annuleru

di la città di Murriali,

divisi in 9 jorna,

 pri la nuvena di lu Santu Natali di Gesù Bambinu

A Maria cui porta affettu

di Giuseppe cui fa cuntu

s’avi ntra lu pettu

senta stu raccuntu:

Lu viaggiu dulurusu

di Maria cu lo so spusu.

PRIMU JORNU

San Giuseppi un jornu stannu

ntra la chiazza in Nazaretti

pri soi affari caminannu

senti sonu di trummetti

senti leggiri un edittu

chi lu cori assai c’ha affrittu.

Chistu edittu cuntinìa

chi ogn’omu d’ogni etati

jri a scrivirsi duvia

a la propria citati

e in tributu poi pagari

qualchi summa di dinari.

A sta nova infausta e ria

San Giuseppi cuntristatu

jiu a la casa ed a Maria

cussì dici adduluratu:

Oh chi nova dulurusa

iu vi portu, amata spusa!

 Oh ch’edittu pubblicari

ntra la chiazza or ora ntisi

gran caminu divu fari

e patiri alcuni spisi

ed iu afflittu pri ubbidiri

a Betlemmi divu iri.

Divu iri a Betlemmi

Stu viaggiu divu fari

o sia sulu o cu vui insiemi

sempri peni aiu a pruvari.

O sia sulu o accumpagnatu

sarò sempri adduluratu.

S’iu vi lassu ahi pena ria!

Sentu spartirmio lu cori.

Si vi portu in cumpagnia

oh chi peni e crepacori!

E chi fari un sacciu ancora

l’unu e l’autru assai m’accora.

A st’affetti dulurusi

di spusu so dilettu

cu palori assai amurusi

cci rispundi tutta affettu

 Spusu miu nun v’affigiti

jamuninni unni vuliti.

La divina vuluntati

cuss’ voli chi partemu

Vegnu pr’unni mi purtati.

 Nun fa nenti si patemu

 jamuninni tutti dui

avrà Diu cura di nui.

Si lu nostru imperaturi

nni cumanna di partiri

cu pruntizza e veru amuri

lu duvemu nui ubbidiri

cori granni o spusu miu

 cussì voli lu miu Diu.

SECUNDU JORNU

A st’affetti di Maria

San Giuseppi ralligratu

 rispundiu Signura mia

vui m’aviti consolatu

vi ringraziu o mia signura

miu cunfortu e mia vintura.

Ma ghiacchì Signura mia

mi vuliti accumpagnari

pri na tanta longa via

qualchi modo aju a circari.

Ora datimi licenza

quantu abbuscu provvidenza.

Si nni và Giuseppi allura

tuttu quantu affannateddu

pri purtari a la Signura

 pighia un bonu ciucciareddu,

ed ancora si disponi

pri la sua provisioni.

Cussì torna a la sua spusa

e cci dici: aiju truvatu

mia Signura majestusa

st’asineddu furtunatu

comu gravida o miu beni

jiri a pedi nun cunveni

Ntra sti vertului cci portu

pocu pisci e quattru pani

pri ristoru e pri cunfortu

ntra sti parti assai luntani

così cchiu fari vurria

ma nun aju, spusa mia.

Maria ancora canuscennu

la divina vuluntà

si và puru dispunennu

pri lu partu chi farà

e s’inchiu nà cascitedda

di li soi nfasciaturedda.

Avia fattu la Signura

culi proprii soi manu

una tila bianca e pura

dilicata in modu stranu

di sta tila fattu avia

li faudili a lu Missia.

San Giuseppi avia abbuscatu

dui di lana panniceddi

e Maria n’avia furmatu

dui puliti cutriceddi

e pruvista di sti cosi

a partiri si disposi.

Già è prucintu di partìri

la Rigina di lu Celu

offerennusi a suffriri

Fami, friddu nivi e jelu

Chi stupuri in virità

cui nun chianci pri pietà.

TERZU JORNU

Già disposta di partiri

la gran Vergini Maria

a lu spusu misi a diri

nginucchiata umili e pia

chista grazia facitimi

spusu miu binidicitimi.

San Giuseppi a chistu eccessu

 d’umiliati senza pari

ripugnando ntra se stessu

 nun sapia chiddu chi fari,

ma furzatu a voti spissi

cu umiltà la benidissi

Dappu st’attu d’umiliati

San Giuseepi parra e dici

Spusa mia cuntenta stati:

 Su cu vui sugnu filici

però sulu patiremu

‘ntra la strada chi farremu

Arrivati in Bettelemi

passirà lu nostru affannu

 pirchì zertu cu vui insemi

tutti a nui ricivirannu

aju ddà tanti parenti

boni amici e conuscenti.

Li mei amici e li parenti

 in videndumi affacciari

tutti allegri e risulenti

 nni virrannu ad incuntrari:

Beni assai nni trattirannu

cera bona nni faranno

Nni faranno ripusari

 si nui stanchi arriviremu

 nni darrannu da manciari

si pri via niu patirwemu

Cussì speru a sensu miu

 silu voli lu miu Diu.

Ma la savia Maria

cu un suspiru dulurusu

ca cchiù affanni previdia

cussì parra a lu so sposu:

Ah miu spusu

si farà la divina volontà

Quantu Diu voli e disponi

sia la nostra cuntintizza

nun timenu afflizioni.

Ne curamu nò alligrizza:

sia la nostra confidenza

la divina previdenza.

Si sarremu rifutati

e da tutti sconosciuti

o sarremu rispettati

e da tutti ben voluti

dirrò sempri o spusu miu

 vi ringraziu miu Diu.

QUARTU JORNU

Chistu avvisu già in sintiri

di Maria lu sposu amatu

 sti palori misi a diri

tuttu quantu nfirvuratu:

 l’ura è tarda chi facemu?

Spusa cara via partemu

Maria Vergini ubbidendu

a cavaddu si mittiu:

lu sò cori a diu offerendu

dannu gustu a lu so Diu

San Giuseeppi caminava

e la retina tirava.

Deci milia serafini

onuraru d’equipaggiu

a sti santi pilligrini

ntra stu poviru viaggiu.

Ralligrannu pri la via

a Giuseppi ed a Maria.

Foru sempri sconosciuti

di li genti disprizzati

da Diu sulu benvuluti

e di l’ancili onurati

nun si curanu di peni

mentri Diu li voli beni.

Mudistedda e rispittusa

viaggiava la signura

quantu è bedda e amurusa

virginedda e matri pura

ogni cori innamorava

di cui a casu la guardava.

Ben cumposta nell’esternu

 risplinnia lu so canduri

riflittia nellu so internu

di Gesù lu grandi amuri

e ntra tuttu lu caminu

va pinzannu a Diu bambinu.

Quantu lagrimi d’affettu

di l’ucchiuzzi cci scapparu

quantu sciammi ntra lu pettu

metidandu s’addumaru!

Jia chiancendu cha scupria

chi sò Figghiu Diu patìa

Pri la strata s’incuntrava

cu diversi piccaturi

e cu un sguardu chi cci dava

cunvirtia ddi cori duri.

Pri pietà Maria, viditimi

sugnu malu cunvirtitimi.

A l’afflitti chi vidia

cu pietà li cunsulava

pri l’infirmi chi scupria

tutt’affettu a Diu prigava.

Iu su poviru o Maria

pietà di l’arma mia!

QUINTU JORNU

Siguitava lu viaggiu

San Giuseppi cu Maria

suppurtandu ogni disagiu

ogni affannu e travirsia.

E tu ingratu e scunuscenti

si patisci ti lamenti.

Cincu jorna di camminu

fari insiemi bisugnaru

camunannu di cuntiunu

senz’aviri nuddu mparu.

Stanculiddi ed affannati

 puvireddi disprizzati.

Pensa tu lu vicchiareddu

quantu lassu e stancu sia

caminannu puvureddu

 sempri a pedi pri la via.

A la spusa riguardava

e affannatu suspirava

.

Chi viaggiu dulurusu

chi fu chistu pri Maria

ntra l’invernu rigurusu.

‘Ntra lu friddu a la campìa!

La Signura di lu celu

ntra lu jazzu e ntra lu jelu.

Benchì l’ancili l’assistianu

rispittusi li guardavanu

li timpesti chi facianu

troppu assai la turmintavanu

Viaggiava mudistedda

 agghiazzata ‘ngriddutedda.

Cussì stanchi ed affannati

‘ntra lu friddu caminavanu

nun truvandu mai pusati

pirchì tutti li sprizzavanu;

 puvireddi li vidianu

pocu cuntu ni facianu.

Su custritti a ripusari

di li staddi ntra l’agnuni

E ‘ntra fundachi alluggiari

sti cilesti e gran Pirsuni.

Oh ch’eccessu d’umiltà!

 Cui nun chianci pri pietà?

 Senza chiantu cui po’ stari

riflittendu chi Maria

è custritta ad abitari

d’animali in cumpagnia?

 Quantu affruntu Maria senti

 misa mmenzu a tanta genti?

Però quantu vosi Diu

 cu pacenzia suppurtaru.

ogni pena e affannu riu

 cu alligrizza toleraru.

Suppurtandu stu disaggiu

fina in tuttu lu viaggiu.

SESTU JORNU

Stanculiddi su arrivati 

doppu tanta lunga via

già traseru a la citati 

menzi morti a la stranìa. 

Ma si tu cciporti affettu 

mettitilli ntra lu pettu! 

Vannu spersi pri li strati 

nudda casa hannu truvatu 

lu risettu incaritati 

di li genti ccè nigatu. 

E di tutti su affruntati 

comu vili su cacciati. 

Doppu tantu caminari 

nun avendu stanza avutu 

jeru a scriversi,e pagari, 

a lu Re lu so tributu 

siguitandu poi a circari

qualchi alloggiu di truvari. 

Ma lu stentu è spisu indarnu 

nun li vonnu dd’almi audaci 

e Giuseppi nell’internu 

nun putia darisi paci. 

E chiancennu ripitia: 

Ch’jiu a fari, amata mia?

Ntra lu chianciri pinzau 

chi dda cc’era na pusata 

pr’unni poi s’incamminau 

cu Maria so spusa amata;

junci e vidi frattaria 

né ccè locu all’osteria.

Na stadduzza era vacanti 

ma Giuseppi nn’è cuntenti; 

dda s’accomoda ntra un stanti 

cu Maria stanca e languenti:

 a lu scuru stanchi e amari 

si jittaru a ripusari.

Però allura su cacciati, 

pirchì vinniru autri genti 

si parteru addulurati 

affruntati veramenti. 

San Giuseppi assai chiancennu 

cussì afflittu jia dicennu: 

Dunca finu m’è nigatu 

chistu miseru risettu? 

O Giuseppi sfurtunatu 

sta disgrazia mai s’ha lettu. 

Spusa mia cara Signura 

e stanotti unni vi scura?

Su quattr’uri di la notti

 già nui semu rifutati 

ajiu fattu quantu potti 

spusa mia pacenza ajati. 

Nun nni voli nuddu ancora,

 jamuninni dunca fora.

SETTIMU JORNU

Fora dunca la citati 

riflittendu chi sapia 

una grutta a ddi cuntrati 

cussì dicilu a Maria!

 Ccà vicinu cc’è na grutta

 Binchì vili e aperta tutta.

Si vuliti pirnuttari

 ntra sta grutta iu vi cci portu

 nun vi pozzu o spusa dari

 autru ajutu autru cunfortu. 

Maria allura ubbidienti 

mustra d’essiri cuntenti.

Cussì inziemi s’inviaru

 pri dda parti a pocu a pocu. 

Già la grutta ritruvaru 

ma assai poviru è lu locu 

e cu tuttu allegri stann

u sempri a Diu ringraziannu.

Tutti dd’angeli beati

 chi pri via l’accumpagnaru 

Cu splinduri inusitati 

chidda grutta circundaru.

 San Giuseppi li vidia 

e videnduli gudia. 

Oh pinzati ch’alligrizza 

di ddi santi amati spusi

 chi gudennu sta biddizza 

sunnu allegri e gluriusi 

Doppu aviri tanti stenti

 a sta vista su cuntenti

A stu lumi gluriusu

 risplindiu la gran Signura 

comu un suli maistusu 

chi v’inciamma ed innamura.

 E Giuseppi cunsulatu 

resta allegru ed incammatu

Cussi ardendu in duci focu 

San Giuseppi cu Maria

canusceru ch’a ddu locu 

Gesù nasciri duvia 

E ntra lagrimi di affettu 

criscia focu a lu so pettu.

Ma videndu poi Maria 

ch’assai lorda era la grutta 

comu matri amanti e pia

 nun la po vidiri brutta 

e na scupa ddà truvannu

 cù umiltà la jiu scupannu.

St’umiltati in riguardari 

di Maria lu spusu amatu 

cominciau puru a scupari 

ma di l’ancili è aiutatu. 

E ntrà un nenti chidda grutta 

resta bedda e netta tutta.

OTTAVU JORNU

Poi chi già purificau 

San Giuseppi chistu locu 

cu l’incegni chi purtau 

jetta luci e adduma focu

 e poi dici ricreativi

 spusa cara via scarfativi.

S’assittaru tutti dui 

nterra e ncostu dilu focu 

e un putendo stari chiui 

si cibaru qualchi pocu

 ma cu gran divuzioni 

fu la sua culazioni.

Pr’ubbidiri a losò spusu 

Maria santa si cibau. 

Ch’autru cibbu cchiù gustusu

 a se stissa priparau.

E pinzandu sempri stà 

a lu partu chi farrà.

Già finuti di manciari 

a Diu grazii rinneru 

e in dulcissimu parrari

 tutti dui si trattineru. 

Discurrennu un pocu pr’omu 

di la’muri d’un Diu Omu.

Oh pinzati chi palori 
tinirissimi dianu 
s’inciammavanu lu cori 
quantu chiù nni discurrianu.
 Ammirannu cu firvuri 
di Gesù lu summu amuri

Canuscendu poi Maria 
junta già l’ura filici chi Diu nasciri duvia 
a lu spusu cussì dici: 
Troppu è notti, ritirativi 
và durmiti e ripusativi.

San Giuseppi e la Signura 
chi durmissi ci prigau. 
C’addubbau la manciatura 
cu lirobbi chi purtau. 
Si ritira poi a n’agnuni 
di ddu poviru gruttuni.

Ma Giuseppi nun durmiu 
ma cun gran divuzioni
 nginucchiunu umili e piu 
misi a fari orazioni  in estasi elevatu 
a Gesù poi vitti natu.

Mancu dormi nò Maria 
ma di Diu chiamata allura 
nfervurata pronta e pia 
s’inginocchia l’ama e adura
 o gran spusi fortunati
 pri mia misiru prigati.

NONU JORNU

Misa già in orazioni

la gran Virgini Maria

cu na gran divuzioni

a Gesù pinsandu

ch’a lu friddu

 nascirà Diu picciridu.

Comu mai,

dici chiancendu

 lu gran Diu di Maestà

di li Re , lu Re tremendu

ntra lu friddu nascirà?

Lu signuri di lu celu

comu nasci ntra lu jelu?

Oh! Miu Diu di gran ricchezza

comu nasci puvireddu

Sarà veru o mia biddizza

chi ti vija ngridduteddu

Chi di friddu tremi e mori

Nun m’abbasta nò lu cori.

Si di nasciri cunveni

pirchì un nasci ntra palazzi?

Pirchì tu nni veni

 cu gran pompi e cu gran sfrazzi?

Lu to summu e granni amuri

ti fa nasciri in duluri.

Via chi tardi o Fighiu miu

Prestu prestu nesci fori

Quandu nasci e quandu o Diu

renni saziu stu cori?

Ntra stu ventri o Diu chi fai?

Quannu quannu nascirai?

Quannu ah quannu nascirai?

Quannnu st’ura vinirà?

Quannu tu consolirai

l’infilici umanità?

Quannu o beni miu dilettu

 t’haiu a strinciri a stu pettu?

Ntra st’affetti e ntra st’amuri

la gran Virgini Biata

tutta focu e tutt’arduri

fu in estasi elevata.

E gudennu lu so Diu

a Gesuzzu parturiu.

Natu già lu gran Missia,

 misi a chianciri e ngusciari

e la virgini Maria

misi ancora a lagrimari.

Lu pigghiau cu summu affettu

 e lu strinci a lu so pettu.

San Giuseppe si risbighia

 già di l’estasi profundi

 E cu duci maravigghia

si stupisci e si cunfundi

curri prestu spavintatu

e a Gesuzzu vidi natu.

Oh pinzati chi cuntentu

chi grandissima alligrizza

 si scurdau di lu so stentu

 pri la summa cuntintizza

 e cu tantu so piaciri

accussì si misi a diri:

Chi furtuna fu la mia!

Oh c’onuri ch’appi iu

d’adulari cu Maria

a stu locu lu miu Diu!

Matri santa e mia signura

iu vi fazzu la bon’ura.

O chi fighiu aviti fattu

 o chi bedda Criatura!

Quantu è beddu vagu

 e intattu la sua facci m’innamura

Chi su amabili sti gighia

 a la matri cci assumigghia.

O ch’ucchiuzzi sapuriti!

Chi linguzza ncarnatedda!

Veramenti beddu siti

la pirsuna tutta è bedda.

Tu si beddu fighiu miu

ma cchiu beddu cha si Diu.